25
(1) Авраам тата Хеттура ятлă арăм илнĕ.
(2) Арăмĕ ăна
Зимран, Иокшан, Медан, Мадиан, Ишбак тата
Шуах ятлă ачасем çуратса панă.
(3) Иокшанăн Шева, [Феман] тата
Дедан çуралнă; Дедан ывăлĕсем çаксем пулнă: [Рагуил, Навдеил,]
Ашурим, Летушим тата Леюмим.
(4) Мадиан
ывăлĕсем: Ефа, Ефер, Ханох, Авида тата
Елдага. Вĕсем пурте Хеттура
ывăлĕсем.
(5) Хăйĕн мĕн пуррине пурне те Авраам [хăйĕн ывăлне] Исаака панă,
(6) çумарăмĕсем çуратнă ывăлĕсене Авраам парнесем панă та хăй сывă чухнех
Исаакран, хăйĕн ывăлĕнчен, тухăç енне тухăçри çĕр çине уйăрса янă.
(7) Авраам
пурăннă кунçул çĕр çитмĕл пилĕк çул пулнă;
(8) Авраам
ватăлса çитсе, [пурăнăçпа] тăраниччен пурăнса вилнĕ, вара канăçлă халăхĕпе
пĕрлешнĕ.
(9) Ăна Исаакпа
Измаил, хăйĕн ывăлĕсем, Махпела текен сăрт
хăвăлне, Ефронăн — хет çыннин, Цохар ывăлĕн — Мамре тĕлĕнчи хирне,
пытарнă,
(10) çав çĕре [тата сăрт хăвăлне] Авраам Хет ывăлĕсенчен сутăн илнĕ
пулнă. Унта Авраампа унăн арăмне Саррăна пытарнă.
(11) Авраам
вилсессĕн, Турă унăн ывăлне, Исаака,
пилленĕ. Исаак Беэрлахайрои çывăхĕнче пурăннă.
(12) Акă Египет
хĕрĕ Агарь — Сарра тарçи — Авраама çуратса панă Измаилăн, Авраам ывăлĕн, йăхĕ-кăкĕ;
(13) акă Измаил
ывăлĕсен ячĕсем, вĕçевĕçĕн çуралса пы
(нă ывăлĕсен ячĕсем: Измаилăн малтан çуралнă ывăлĕ Наваиоф,
ун хыçĕнчен Кедар, Адбеел, Мивсам,
(14) Мишма, Дума, Масса,
(15) Хадад, Фема, Иетур, Нафиш
тата Кедма.
(16) Хăйсен ялĕхулинче, хăйсен тапăрĕсенче
пурăнакан Измаил ывăлĕсем çаксем ĕнтĕ, вĕсен ячĕсем
çаксем ĕнтĕ. Вĕсем — хăйсен ăрăвĕсен вуникĕ çулпуçĕ.
(17) Измаил
пурăннă кунçул çĕр вăтăр çичĕ çул пулнă; вара унăн ĕмĕрĕ иртнĕ, вăл вилнĕ,
канăçлă халăхĕпе пĕрлешнĕ.
(18) Вĕсем Хавилапа
Сур хушшинче пурăннă, Сур вара Ассирие кайнă чухне Египет тĕлĕнче
юлать. Вĕсем хăйсен пĕтĕм тăванне хирĕçех вырăнаçса
тухнă { Вĕсем
хăйсен пĕтĕм тăванĕпе килĕштермесĕр пурăннă тесе те ăнланма
пулать.}.
(19) Акă Исаакăн,
Авраам ывăлĕн, йăхĕ-кăкĕ. Авраамран Исаак çуралнă.
(20) Ревеккăна
— Месопотамире пурăнакан арамей
çыннин Вафуилăн хĕрне, арамей çыннин
Лаванăн йăмăкне — хăй валли качча илнĕ чухне Исаак
хĕрĕх çулта пулнă.
(21) Исаак
хăйĕн арăмĕшĕн [Ревеккăшăн] Çÿлхуçана
кĕлтунă, мĕншĕн тесессĕн вăл тип варлă пулнă; Çÿлхуçа ăна илтнĕ, вара Ревекка, арăмĕ, йывăр çын пулнă.
(22) Ывăлĕсем ĕнтĕ унăн варĕнчех
çапкалашма пуçланă, вăл вара: капла пулас пулсассăн, мĕн кĕтетха мана? тенĕ. Вара Çÿлхуçаран ыйтма кайнă.
(23) Çÿлхуçа ăна каланă: санăн ăшунта
икĕ ăру; санăн варунтан икĕ тĕрлĕ халăх тухĕ: пĕр халăхĕ тепринчен вăйлăрах
пулĕ, асли кĕçĕннине пăхăнса тăрĕ, тенĕ.
(24) Ĕнтĕ унăн çуратас вăхăчĕ
çитнĕ: акă унăн варĕнче йĕкĕрешсеммĕн.
(25) Малтанхи хĕпхĕрлĕ çуралнă,
пĕтĕмпе тир пек çăмлă пулнă, ăна Исав ятлă хунă.
(26) Унтан унăн шăллĕ çуралнă, вăл аллипе Исав ури тупанĕнчен тытса тухнă; ăна Иаков
ятлă хунă. Вĕсем [Ревеккăран]
çуралнă чухне Исаак утмăл çулта пулнă.
(27) Ачасем ÿссе çитĕннĕ; Исав кайăк тытма ăста çын пулнă, хир çынни пулнă; Иаков йăваш çын, чатăрта пурăнакан çын пулнă.
(28) Исаак Исав
тытнă кайăк ашне кăмăлланă, çавăнпа вăл Исава юратнă, Ревекка вара Иакова юратнă.
(29) Иаков
апат пĕçернĕ пулнă; Исав хиртен ĕшенсе килнĕ.
(30) Исав Иакова
каланă: эсĕ мана хĕрлине, çак хĕрлине çиме парха, эпĕ ĕшенсе килтĕм, тенĕ.
Çавăнпа ăна Эдом теме пуçланă.
(31) Анчах Иаков [Исава] каланă: малтан мана
хăвăн аслăлăхна сут, тенĕ.
(32) Исав:
акă эпĕ вилетĕп; малтан çурални мана мĕне кирлĕ? тенĕ.
(33) Иаков
[ăна] каланă: тупату халех, тенĕ. Вăл ун умĕнче тупа тунă, çапла [Исав] хăйĕн аслăлăхне Иакова сутнă.
(34) Иаков Исава
çăкăрпа ясмăк яшки панă; вăл çинĕ, ĕçнĕ, унтан тăрса тухса кайнă; çапла Исав хăйĕн аслăлăхне пăрахăçланă.
